Britaniya nüvə başlıqlarını təkmilləşdirmək niyyətindədir

Böyük Britaniya köhnə “Vanguard” sinifli sualtı qayıqlarını əvəz edəcək və nüvə başlıqlarını təkmilləşdirəcək.

“Report” TASS-a istinadən xəbər verir ki, bu barədə ölkənin Silahlı Qüvvələrinin növbəti illər üçün inkişafı üzrə dərc olunmuş planında deyilir.

Sənəddə xatırladılır ki, 2016-cı ildə Böyük Britaniya parlamenti nüvə çəkindirici qüvvələrinin təkmilləşdirilməsinə və “Vanguard” sinifli sualtı qayıqların dörd yeni “Dreadnought” sinifli sualtı qayıqla əvəzlənməsinə səs verib. Bu tipli ilk sualtı qayıq 2030-cu illərin əvvəllərində istismara veriləcək.

Planda deyilir ki, “Dreadnought tipli sualtı qayıqların istismarı boyu çəkindirici vasitələrin effektivliyini təmin etmək üçün biz nüvə başlıqlarımızı da dəyişdirəcəyik” və qeyd olunur ki, ölkədə sualtı qayıqlar və əvəzedici döyüş başlıqları hazırlanır və yaradılır.

Report.az