İsveçdə dövlət qurumları üçün nəzərdə tutulan innovativ süni intellekt modeli hazırlanıb

İsveç dövlət sektorlarının əməkdaşları üçün nəzərdə tutulmuş Chat GPT-yə bənzər süni intellekt modeli gələn həftə istifadəyə veriləcək.

Trend-in məlumatına görə, bu süni intellekt modelinin əsas məqsədi mətni ümumiləşdirmək və təhlil etmək qabiliyyətinə malik hesabatların, bəyanatların və digər sənədlərin oxunmasını və tərtibini asanlaşdıran dövlət məmurlarının köməkçisi kimi çıxış etməkdir.

Layihə qismən dövlət tərəfindən maliyyələşdirilən “AI Sweden” şirkətinin iştirakı ilə bir sıra bələdiyyə və regionlarla əməkdaşlıq çərçivəsində həyata keçirilir. Modelin tam praktiki istifadəyə verilməsi 2026-cı ilə planlaşdırılır. Bu cür sistemlərin müəyyən vəzifələrin öhdəsindən uğurla çıxmasına baxmayaraq, onların davranışı hələ də gözlənilməz olaraq qalır.