KİV: İsrail Kəşfiyyat Nazirliyi Qəzza sakinlərinin Misirə köçürülməsi planını hazırlayıb
İsrail Qəzza zolağından 2,3 milyonluq əhalini Misirin Sinay yarımadasına köçürmək üçün təklif hazırlayıb.
“Associated Press” xəbər verir ki, İsrail Baş naziri Benyamin Netanyahunun ofisi Kəşfiyyat Nazirliyinin tərtib etdiyi bu sənədi hipotetik hazırlıq – “konseptual sənəd” kimi qiymətləndirib.
“Biz istənilən yerə, istənilən formada köçürmənin əleyhinəyik və bunu “qırmızı xətt” hesab edirik. 1948-ci ildə baş verənlərin bir daha təkrarlanmasına icazə verilməyəcək”, – sənədə münasibət bildirən Fələstin Prezidenti Mahmud Abbasın sözçüsü Nabil Əbu Rudeynə deyib.
Sənəd oktyabrın 13-ə aiddir. Onu ilk dəfə yerli xəbər saytı olan “Sicha Mekomit” nəşr edib.
Tədqiqat aparan, lakin siyasi xətti müəyyən etmək səlahiyyəti olmayan Kəşfiyyat Nazirliyi öz hesabatında HAMAS-ın hücumundan sonra başladılan hərbi əməliyyatlar fonunda Qəzza zolağında mülki reallıqda əhəmiyyətli dəyişiklik etmək üçün bu alternativi təklif edib.
Sənədin müəllifləri bu alternativi İsrailin təhlükəsizliyi üçün ən arzuolunan variant hesab ediblər.
Sənəd Qəzzanın mülki əhalisini Sinayın şimalındakı çadır şəhərciklərinə köçürməyi, sonra daimi şəhərlər və qeyri-müəyyən humanitar dəhliz tikməyi təklif edir. Sənədə əsasən, köçkün fələstinlilərin ölkəyə girişini əngəlləmək üçün İsrail daxilində təhlükəsizlik zonası yaradılacaq. Sənəddə Qəzzanın əhalisi oradan çıxarıldıqdan sonra ərazinin vəziyyətinin nə olacağı açıqlanmayıb.
Misir Xarici İşlər Nazirliyi hesabatla bağlı AP-ın sorğusuna cavab verməyib.
Lakin Misir son müharibə boyu Fələstin qaçqınlarını qəbul etmək istəmədiyini açıq şəkildə bildirib.
Sənədə görə, Misir fələstinli qaçqınların son dayanacağı olmayacaq. Sənəddə Misir, Türkiyə, Qətər, Səudiyyə Ərəbistanı və Birləşmiş Ərəb Əmirliklərinin ya maliyyə, ya da Qəzzanın sakinlərini qaçqın və uzunmüddətli perspektivdə vətəndaş kimi qəbul etmək planını dəstəkləməsindən bəhs edilir. Sənəddə əlavə olunur ki, Kanadanın “yumşaq” immiqrasiya siyasəti də onu qaçqınları qəbul edə biləcək potensial hədəf ölkəyə çevirir.
“İlk baxışda bu təklif beynəlxalq legitimlik baxımından mürəkkəb ola bilər”, – sənəddə etiraf edilir və əlavə edilir ki, “Bizim qiymətləndirməmizə görə, əhali təxliyə edildikdən sonra döyüşlər, əhalinin qalacağı təqdirdə gözlənilənlə müqayisədə daha az mülki itkiyə səbəb olacaq”.
Sənədlə tanış olan İsrail rəsmisi bunun məcburi bir sənəd olmadığını və bununla bağlı təhlükəsizlik rəsmiləri ilə heç bir əsaslı müzakirə aparılmadığını deyib. Netanyahunun Ofisi bunu “hökumətin və onun təhlükəsizlik agentliklərinin bütün səviyyələrində hazırlanan konsepsiya sənədi” adlandırıb.
“İsraildə hazırda HAMAS-ın idarəetmə və hərbi imkanlarının məhv edilməsinə yönəlmiş əməliyyat zamanı heç bir rəsmi platformada “ertəsi gün” məsələsi müzakirə edilməyib”, – Baş nazirin Ofisindən bildirilib.
Sənəd İordan çayının qərb sahilində yerləşən Fələstin Dövlətini Qəzzada suveren qüvvə kimi bərpa etmək və ya yerli rejimi dəstəkləmək təkliflərini rədd edir.
Sənəddə bildirilir ki, Qəzzadan qovulmuş Fələstin Dövlətinin bərpası Fələstin Milli Hərəkatının görünməmiş qələbəsi olacaq və İsrailin təhlükəsizliyinə xidmət etmir.
