Qəzza zolağında daha üç israilli girovun cəsədi tapılıb
İsrail Müdafiə Ordusu (SAXAL) Fələstinin HƏMAS hərəkatı tərəfindən 2023-cü il oktyabrın 7-də Qəzza zolağında qaçırılan daha üç girovun cəsədini tapıb.
Bu barədə SAXAL-ın Mətbuat Xidməti məlumat yayıb.
“SAXAL və Ümumi Təhlükəsizlik Xidmətinin (ŞABAK) birgə əməliyyatı nəticəsində daha üç girovun – Hanan Yablonka, Mişel Nisenbaum və Orion Hernandesin cəsədləri tapılaraq İsrailə gətirilib”, – deyə məlumatda bildirilir.
Mətbuat Xidmətinin məlumatına görə, onlar 2023-cü il oktyabrın 7-də HƏMAS-ın İsrailə hücumu zamanı həlak olublar, cəsədləri isə Qəzza zolağına aparılıb.
Qeyd edək ki, İsrail tərəfinin rəsmi məlumatlarına görə, Qəzza zolağında hələ də 125 girov saxlanılır, onlardan 39-nun öldüyü ehtimal edilir. Humanitar səylər və müxtəlif əməliyyatlar zamanı meyitləri anklavdan çıxarılanlar da daxil olmaqla indiyədək 131 girov HƏMAS əsirliyindən azad edilib.
